Spáiði í það hvað þið setjið á netið?

Hver kannast ekki við tengslasíður eins og My Space og Facebook? Vinnuveitandinn ykkar kannast eflaust við þær og er ekki sérlega hrifinn, hvað þá af MSN eða þessu bévítans bloggi. Það byrjar nefnilega enginn að vinna á morgnana nema hafa hangið á netinu í svona klukkutíma fyrst. Jú kanski iðnaðarmenn sem hafa enga tölvu til að slugsa yfir, þeir hanga bara í kaffi í staðinn.

 Anyway, að hanga á netinu er samt ekki bara að hanga á netinu. Það skiptir máli hvernig hangsinu er háttað. Það sem þú setur á netið er þar for everyone to see. Ef fólki er á annað borð annt um mannorð sitt og ímynd út á við þá ætti það að spá í hvað það setur á netið. Ef þú ert t.d að leita þér að góðri vinnu þá skiptir það miklu máli. Það er þér ekki til framdráttar ef tilvonandi vinnuveitandi, sem er t.d virðuleg fjármálastofnun sem ekki má vamm sitt vita googlar þig og það fyrsta sem poppar upp eru myndir frá blautbolakeppni á Fjörukránni eða ef þú ert karlmaður og póstaðir á My Space síðunni þinni vídeói af því þegar þið félagarnir stunguð stjörnuljósum upp í afturendann á hvor öðrum á síðasta gamlárskvöldi. Mjög fyndið þá eflaust en ekki það sem að þú vilt að bossinn þinn sjái.

 Það eru til fyrirtæki úti í hinum stóra heimi sem hafa þá starfsemi að finna upplýsingar um fólk á netinu. Þá annað hvort til að eyða þeim fyrir viðkomandi aðila sem telja þær sér skaðlegar eða að einhver þriðji aðili vill komast að öllu um þig sem hægt er að grafa upp. Þegar þú ert orðinn ráðsettur fjölskyldufaðir með konu, börn og jeppa og ert jafnvel að hugsa um að demba þér í pólitíkina þá viltu alls ekki að myndirnar af þér frá Hróarskeldu ´96 þar sem þú lást inni í tjaldi með jónu á stærð við upprúllaðan sunnudagsmogga og tvær hálfnaktar súludansmeyjar í eggjandi stellingum að halda uppi fjörinu, leki út. Og bloggið þar sem þú segir frá því á hispurslausan hátt að raddirnar í höfðinu á þér hafi sagt þér að það vséu geimverur á meðal vor að reyna að taka yfir heiminn og að þær búi í Vogunum, er heldur ekki gott move.

Og strákar mínir, stelpurnar hafa fyri löngu tekið tæknina í sína þágu. Þú hittir stelpu á djamminu, þið farið að daðra pínu, þið skiptist á símanúmerum og svo fer hver til síns heima (nema auðvitað að báðir aðilar sleppi undanrásunum og fari beint í úrslitaleikinn). En svo hringir daman ekki til baka og svarar ekki þegar þú hringir og þú skilur ekkert í af hverju? Jú, ástæðan er einföld. Það fyrsta sem hún gerði var auðvitað að googla þig og komst að því að þú hljópst allsber inn á Laugardalsvöllinn í landsleik fyrir þrem árum, þú safnar límmiðum af bjórflöskum og að í fyrra fórstu á Star Trek ráðstefnu í Los Angeles, þú kannt Klingónsku og það er mynd af þér í Klíngónabúning á heimasíðunni þinni. Fyrir allt venjulegt kvenfólk þá er þetta ekki mikið turn-on.

Þannig að næst þegar þið setjið eitthvað á netið spáiði í því hvað þið eruð að setja þangað. Og ef þið eruð á 5. glasi, sleppiði því bara alveg!

Hvaða karlmaður vill ekki svona?

Myndin hér til hliðar er af nýja Porsche Poggenphol P'7340 eldhúsinu og er eflaust draumur hvers karlmanns að hafa eitt slíkt. Porsche er fyrirtæki sem horfir til framtíðar og lætur sér því ekki nægja að framleiða bíla heldur eru þeir með undir sínum merkjum úr, farsíma, kaffivélar og nú síðast heilt eldhús, hvorki meira né minna. Eins og sést á myndinni er þetta ákaflega stíliserað og mínimalískt og eins og sést líka þá hefur enginn karlmaður enn komið inn í þetta eldhús sem er þarna á myndinni þar sem allt er enn ákaflega snyrtilegt og hreint.

En hvað er það við þetta eldhús sem á að höfða frekar til karlmanna en t.d IKEA gerir? Til að byrja með eru sérstakt efni í öllum ytri flötum sem er sérstaklega hannað til að hrinda frá sér óhreynindum þannig að 5 vikna gamlir tómatsósublettir hreinsast auðveldlega af og sömu leiðis glasaför og kaffislettur. Innbyggði ísskápurinn rúmar 48 bjórdósir og það eru sérstök hólf þar sem hægt er að geyma hálfétnar pizzur og pylsupakka. Annað þarf í raun ekki að komast þar fyrir. Örbylgjuofninn er sérstaklega hannaður til að hita upp Thai take-away á sem skemmstum tíma auk þess sem í honum er sérstök krús sem til að hita upp kalt kaffi án þess að sjóða það. Innbyggt 48 tommu flatskjásjónvarp fylgir þessu eldhúsi auk Playstation tölvu

Engin þörf þótti vera á eldavél en þess í stað var hægt að nýta plássið undir extra stóran vask sem rúmar minnst 20 daga notkun af óhreynu leirtaui. Honum fylgir auk þess sérstakt lok sem hægt er að smella yfir hann ef gesti ber að garði og er það alveg loftþétt þannig að það heldur inni allri óæskilegri lykt ef um viðkvæma aðila er að ræða eins og aldraðar frænkur. Vaskurinn er einnig það stór að með góðu móti mætti nota hann til að baða heimilishundinn, hamfletta 12 gæsir í einu eða þrífa vél úr Ford Mustang ´68.

Þó vaskurinn sé merkileg hönnun þá er hann ekki það sem framleiðendurnir eru stoltastir af. Það mun nefnilega vera innbyggða þvottavélin. Hún er þeim kostum gædd að skynja muninn á ljósum og dökkum þvotti þar sem oft getur reynst erfitt að finna út úr því þegar verið er að setja í vélina um leið og verið er að horfa t.d á fótbolta í sjónvarpinu, og ekki nóg með það heldur getur hún flokkað í sundur þvott eftir litum eftir að hann hefur verið settur í vélina og fært hann í þar til gert hólf þar sem hann blandast ekki öðrum þvotti. Það eina sem þarf að passa er að tæma hólfið minnst einu sinni í mánuði. Það er auk þess bara ein hitastilling og eitt þvottakerfi. Rúsínan í pylsuendanum er svo að þvottavélin er búin sérstakri sugu sem getur sogað upp af eldhúsgólfinu allt smærra tau eins og óhreina sokk, nærföt og skyrtur og fer það þá beint inn í vélina.

Framleiðendurnir vonast til að þetta glæsilega eldhús eigi eftir að slá í gegn meðal karlmanna enda hannað algerlega eftir þeirra þörfum. Þeir munu svo vera með í hönnun bílskúr fyrir konur þar sem gert er ráð fyrir parketlögðu gólfi, 6 fataskápum, mátunarherbergi ef þörf er á að skipta um föt á síðustu stundu, 3ja sæta leðursófa, símatengi sem hægt er að tengja allt að 4 síma við og baðherbergi með freyðibaði. Nú er verið að finna út úr því hvað á að gera við bílinn

Þú ert það sem þú borðar

Hver kannast ekki við umræðuna um ofvirkni og athyglisbrest? Börn í dag eru ekki lengur óþekktarormar og slugsar sem ekki hafa verið siðuð almennilega til af foreldrum sínum heldur eru þau með ofvirkni og athyglisbrest og gott ef ekki lesblindu líka. Það er sem sagt búið að gera þau að heilbrigðisvandamáli með tilheyrandi lyfjaáti og sérfræðimeðferðum í staðinn fyrir að kenna þeim einfalda mannasiði og að hegða sér skikkanlega. Leti og uppivöðslusemi eru svo afsökuð með því að aumingja barnið þjáist af ofvirkni og geti bara ekkert í þessu gert.

En það er ýmislegt hægt að gera annað en að troða í krakkann rítalíni. Til að byrja með er hægt að ala hann almennilega upp og kenna mannasiði en til þess þarf tíma og einbeittan vilja og oft á tíðum virðast foreldrar hafa hvorugt. Skólinn á að sjá um þetta. Annað sem myndi eflaust bæta ástandið á mörgum heimilum og í mörgum skólastofum er að gefa börnunum almennilegan mat. Það eru nefnilega gömul sannindi og ný að þú ert það sem þú borðar. Og þetta á reynadar ekki bera við um börn heldur hreinlega alla. Fólk nennir ekki orðið að elda mat frá grunni lengur, heldur er allt keypt tilbúið eða eitthvað unnið.

Vitið þið t.d hvað er í pylsum (sjá mynd hér til hliðar af innvolsinu í pylsu) eða örbylgjumat? Við erum endalaust að belgja okkur út af litarefnum, rotvarnarefnum, þráavarnarefnum, þykkingarefnum, bindiefnum, sýrum, sætuefnum, bragðaukandi efnum o.s.frv, o.s.frv. Næst þegar þið kaupið eitthvað tilbúið athugið á umbúðunum hvað það eru mörg E-efni í viðkomandi vöru. Ég er t.d með hérna fyrir framan mig dós af Coke Light og í henni eru E 150 sem er lirarefni, E 338 og E 339 sem eru sýrur, E 211 sem er rotvarnarefni og sætuefnið aspartam. þetta getur ekki verið hollt. Mér finnst líka alltaf skondið að sjá þegar því er slegið upp í auglýsingum að þessi eða hin matvaran sé fitusnauð. Gott og vel, en það er ekki minnst á hvað er mikill sykur í viðkomandi vöru og ef það er eitthvað sem við þurfum ekki á að halda að borða meira af þá er það sykur, ekki fita. Í einni lítilli fernu af Frissa Fríska sem fólk fóðrar börnin sín gjarnan á eru 20 gr. af sykri sem eru ca. 10 sykurmolar og í einni dós af Skólajógúrt eru 5 sykurmolar. Svo er fólk hissa á því að börnin séu snar vitlaus!

 Á mínum sokkabandsárum norður í landi var ekki svona mikið um unnin matvæli eins og er í dag og þar var eldað á hverju heimili nánast á hverjum degi (hina dagana voru afgangar). Hamborgarar og franskar voru sjaldan í boði og pizzuvæðingin hafði ekki yfirtakið allt enn og sælgæti var spari. Ég minnst þess heldur ekki að í minni grunnskólatíð hafi einhver átt við ofvirkni, athyglisbrest eða einhverjar geðraskanir að stríða. Stundar athyglisbrestur var oftast læknaður snarlega á staðnum með hótun um heimsókn til skólastjórans. Það voru vissulega alltaf einhverjir einn eða tveir óþekktargemlingar í hverjum bekk en enginn sem var óviðráðanlegur eða stjórnlaus og kennarar þurftu ekki að vera búnir að taka námskeið í sjálfsvarnaríþróttum til að komast í gegn um skólaárið.

 Hvernig væri nú að í staðinn fyrir að aumingjavæða fjöldann allan af grunnskólabörnum og moka í þau lyfjum að þeim væri bara gefið almennilega að borða?

Eurotrash

Ég hef ekkert verið að tjá mig um Júróvisjón hingað til enda ekki heyrt neitt af þessum lögum, eða þar til í kvöld. Ég sá fram á það að ég yrði nákvæmlega ekkert með í umræðunum næstu dagana ef ég hefði ekki horft á öll ósköpin og þar sem ég legg það heldur ekki í vana minn að tala um það sem ég veit ekkert um (ég starfa nefnilega ekki sem stjórnmálamaður) þá lagði ég á mig þessa rannsóknarvinnu.
Það ryfjaðist upp fyrir mér strax á fyrstu mínútunum af hverju ég hef ekki lagt mig neitt sérstaklega eftir því að fylgjast með þessari keppni undanfarin ár, þegar flutt var syrpa af gömlum Júróvisíonslögurum. Helmingurinn af lögunum hljómaði eins og þau væru eftir Geirmund Valtýsson og vekja eflaust góða stemmingu á sveitaballi í Miðgarði. Hinn helmingurinn var eins og Þorvaldur Bjarni hefði annað hvort samið þau eða útsett þar sem allt sem hann kemur nálægt hljómar eins. Og hverjum öðrum en RÚV dettur í hug að láta mann sem gæti verið ný kominn af þorrablóti á Ströndunum og ennþá í gúmmístígvélunum og hefði fram að þessu haft atvinnu af að stýra landbúnaðarsýningum kynna svona galmúrshow?
En hvernig voru svo lögin?
Lag 1. Þorsteinn Olgeirsson. Late 80's Elton John rip off. Og late 80´s var mjög vont tímabil hjá Elton John. Og af hverju þurfa lúðrablásarar alltaf að vera eins og fífl?
Lag 2. Páll Rósinkrans. Týpískt Sálarlag með einhverju gospel tvisti. Svona allir-saman-nú viðlag og á eftir að slá í gegn hjá Hvítasunnusöfnuðinum. Kosið af eldri konum sem finnst hann Páll svo góður drengur
Lag 3. Eurobandið. Europop í sinnu bestu eða verstu mynd, eftir því hvernig litið er á það. Á eftir að hljóma á diskótekunum í Búlagaríu og Rússlandi þar sem Europopið er það heitasta í dag. Verður líka eflaust blastað á næstu Gay Pride
Lag 4.Ragnheiður Gröndal. Höfundur þessa lags hefur horft á allt of mikið af söngleikjum í gegn um tíðina og dreymir dagdrauma um frægð og frama á Broadway. Ég var búin að gleyma hvernig þetta lag var 2 mínútum eftir að það kláraðist
Lag 5. Mercedes club. Ef það væri 1991 og allir væru enn að fara á raveklúbba og hakka í sig E pillur þá væri þetta lag kanski eitthvað í takt við tímann. Held m.a.s að þetta sé of yesterday fyrir Rússana og Búlgarina. Söngkonan hefur heldur ekki verið valin út frá sönghæfileikum heldur örugglaga af því að hún leit best út í latexdressinu. Tvímælalust kjánahrollur kvöldsins.
Lag 6. Baggalútur. Æji, óskaplega er þetta mikið þúfnapopp. Þetta er jafn íslenskt og Hvannarrótarbrennivín og kæst skata og höfðar nákvæmlega jafn mikið til annara þjóða og þær "ágætu" afurðir. Rétti staðurinn fyrir þetta lag er Kringlukráin á laugardagskvöldi
Lag 7. Birgitta og Magni. Álíka tilþrifamikið lag og blautir ullarsokkar og jafn minnisstætt og síðasta klósettferð. Og í hverju var Birgitta eiginlega? Designer rjúpnavesti?!
Lag 8. Dr. Spock. Líklega skásta lagið í keppninni en ekki merkileg lagasmíð. Verðlaun fyrir bestu búningana. Fyrirmynd Dr. Spock er augljóslega Mike Patton og Mr. Bungle og er langt um betri

Að ná sér í deit

Þar sem konudagurinn er á sunnudaginn og allt vaðandi í auglýsingum um gjafir sem eiginmenn geta glatt konurnar sínar með og þau síðan lifað saman til æfiloka umvafin ást og rómantík, þá datt mér í hug að koma hér með nokkur ráð til þeirra óhamingjusömu sála sem eru einhleypar og fá hvorki konfekt né köku ársins. Það er nefnilega ýmislegt hægt að gera til að ná sér í deit ef viljinn er fyrir hendi.

Klassíska íslenska aðferðin er auðvitað að hella sig fulla á einhverjum bar og bíða eftir að einhver þvoglumæltur karlmaður með fráhneppta skyrtuna og bindið á höfðinu geri hosur sínar grænar með pick-up línum eins og; "Þú veist að húðin er stæsta líffærið, nema ekki hjá mér" eða "Trúirðu á ást við fyrstu sýn eða þarf ég að koma aftur?". Þar sem að það er nauðsynlegt að vera a.m.k á 5. glasi í svona aðstæðum þá hentar þetta ekki öllum.

En það er engin ástæða til að örvænta, það eru til ýmsir staðir þar sem næla má í deit. Það má t.d skrá sig á allskonar námskeið. Það þarf þó að hafa í huga hvaða týpu af karlmanni verið er að sækjst eftir. Einhleypir karlmenn sem mæta á bútasaums- eða keramiknámskeið eru að öllum líkindum gay svo þú getur gleymt því að pikka einhvern upp þar. Að fara á fluguhnýtinganámskeið er strax skárra ef þú ert að leita að þessari þöglu, einbeittu týpu en ef þú ert að leita að hreinu testosteroni, þ.e einhverjum sem myndi massa bílinn þinn eða brjóta niður millivegg án þess að blikka þá ferðu á vinnuvélanámskeið. Og ef þú heillast af gáfuðu og nördalegu týpunni þá ferðu auðvitað á forritunarnámskeið

Ef námskeiðin eru ekki að heilla þá má alltaf reyna leikhúsin. Það er mesta furða hvað margir einhleypir karlmenn sækja leikhús. Þeir eru að vísu allir komnir vel yfir miðjan aldur og vilja konu sem hugsar um þá eins og móðir þeirra gerði en það getur bara verið krúttlegt. Í hlénu geturðu komið með einhver gáfuleg komment um sýninguna og vonast til að að fá boð í kakó og vöfflur að sýningu lokinni, jafnvel að hann gauki að þér ljóðabók með ljóðum eftir sjálfan sig og þó svo að eitthvert ljóðið hljómi á þessa leið:

• Þar sem eldarnir loga í innyflum mínum
• og hjarta mitt er sem kótiletta á kolagrilli
• þar mun ástin finna sér samastað
• og hugur minn ilma sem nýþvegin rúmföt á snúru.
• Eins og tveir götuvitar sem horfast í augu
• og hvor gefur hinum grænt ljós
• þannig mun ég að endingu finna þig

...þá er stranglega bannað að fara að hlæja!

Þeir sem nenna ekki að hanaga í leikhúsi geta reynt að fá sér hund og farið með hann út að ganga á stöðum þar sem hundaeigendur viðra seppana sína. Margir einhleypir karlmenn eiga hund. Þú getur fylgst með þegar þeir koma, ef viðkomandi lítur út fyrir að vera yngri en 35 og þú kemur hvorki auga á barnastól leikföng í bílnum þá er hann mjög líklega einhleypur. Reyndu að láta hundinn þinn hnusa að hundinum hans og komdu með einhver skemmtileg komment til að brjóta ísinn. Passaðu þig bara á því að hundurinn þinn sé ekki Chihuahua og hundurinn hans Doberman. Getur endað illa.

 Verslunarferðin getur líka verið veiðiferð ef rétt er á spöðunum haldið. Farðu í 10-11 að kvöldi til og skimaðu eftir körlum sem eru að versla og þér líst vel á. Fjölskyldumenn eru ekki að versla á kvöldin, þeir eru heima að svæfa krakkana. Það eru því miklar líkur á að karlmaður sem er að versla á þessum tíma sólarhrings sé einhleypur. Skoðaðu laumulega hvað hann er að versla til að vera alveg viss. Ef það er snakkpoki, kippa af pilsner og pylsupakki í körfunnu þá er það alveg öruggt. Það má svo alltaf reyna að koma af stað einhverjum samræðum við kókkælinn

Ef allt þrýtur þá eru bílasölur á sunnudögum síðasti séns, það er að segja ef þér er sama þó að það fylgi börn með í pakkanum. Þangað mæta nefnilega allir helgarpabbarnir þegar þeir eru búnir að fara að gefa öndunum, skoða skipin og kaupa ís og þeim dettur ekkert annað í hug til að gera.

Nú, ef ekkert af þessu virkar þá ættirðu bara að halda áfram að reyna á einkamál.is

Þú gætir haft það verra...

Það eru margir sem sífellt nöldra og tuða yfir vinnunni sinni. Hvað hún sé nú leiðinleg og einhæf og erfið og heilsuspillandi og mannskemmandi og hver veit hvað. Svo ekki sé minnst á hvað kaupið sé lélegt og vinnutíminn langur. Ég hélt reyndar að nú orðið væru það Pólverjar sem sinntu öllum þeim störfum sem þessi lýsing ætti við en það kann að vera misjafnt hvað fólki finnst erfitt og heilsuspillandi. Einhverjum finnst kanski erfitt að tapa 700 millum í hlutabréfabraski meðan aðrir gera það með brosi á vör og fá feitan starfslokasamning fyrir ómakið

En þið sem finnst þið vera í ömurlegu djobbi getið mörg hver huggað ykkur við það að það er til ýmislegt verra en það sem þið þurfið að gera. Kyngreinir á kjúklingabúi er t.d varla mjög eftirsóknarvert starf en það er samt sem áður starf sem einhver þarf að sinna. Það felst sem sagt í því að skoða upp í afturendann á hænuungum til að komast að því hvers kyns þeir eru því t.d eggjabú hefur lítið með fjöldann allan af hönum að gera. Þeir eru væntanlega bara étnir.

Ef þú vinnur hjá svitalyktareyðisframleiðanda gæti starf þitt verið að þefa af mis sveittum handarkrikum allan daginn til að fylgjast með gæðum framleiðslunnar.

Vísindarannsóknir á hvölum er eitthvað sem við könnumst við. Hér eru þeir bara drepnur og innvolsið skoðað í rólegheitum. Hjá siðaðri þjóðum eru ekki eins brútal aðferðir notaðar heldur er hvalaskít safnað og hann skoðaður gaumgæfilega. Og það er sem sagt til fólk sem vinnur við að veiða upp hvalaskít

Að vera vísindamaður er fancy djobb en vísindastörf eru æði misjöfn. Fornleifafræði þekkja allir en það er líka til nýleifafræði ("garbology") sem felst í því að gramsa í ruslatunnum og ruslahaugum til að rannsaka t.d neyslumynstur fólks. Slíkar rannsóknir hafa til að mynda sýnt fram á það að bleyjur er um 2% af venjulegum ruslahaug meðan 45% er ýmiskonar pappír og að pylsa getur geymst í vel þjöppuðum ruslahaug í allt að 25 ár án þess að rotna að fullu. Einnig að það er samhengi á milli kattaeignar (þ.e losunar á kattaúrgangi) og lesturs á Séð og Heyrt

Að gelda fíla í dýragörðum er líka starf sem þarf að sinna því ógeltir fílar eins og önnur karldýr, geta verið viðskotaillir og önugir. En þar sem fílaeystu er aðeins á stærð við fótbolta en fíllinn sjálfur all mikið stærri og erfitt að komast að þeim þá er þetta ekki starf fyrir hvern sem er.

Starf ræstitæknis þykir ekki spennandi nú til dags en að vera ræstitæknir í líkhúsi þar sem framkvæmdar eru krufningar er líklega mest óspennandi af öllu nema þú sért týpan sem finnst spennandi að finna alltaf eitthvað nýtt í ruslinu, ef ekki búta af rifbeinum eða afskurð af húð þá bita af lifur eða eitt eyra eða tvö. Viðkvæmni fyrir blóði og öðrum líkamsvessum gengur heldur ekki í því starfi.

 Þannig að þið sem kvartið undan vinnunni ykkar takiði gleði ykkar á ný, þetta gæti nefnilega verið miklu verra

Hvernig verður maður dýrlingur

Ég var að sjá það í einu blaðinu í dag að Páfagarður hefur hert reglurnar um það hvað þarf til að einhver verði lýstur dýrlingur, þannig að fyrir áhugasama tilvonandi dýrlinga fer þetta að verða ansi strembið.

En hvað þarf maður að gera til að eiga séns á því að verða dýrlingur? Til að byrja með er gott að vera kaþólskur auk þess sem nauðsynlegt er að vera dauður og hafa verið það ansi lengi. Síðan þarf einhverjum biskupi að þykja þú nógu merkilegur pappír til að mæla með því við Páfagarð að það verði skoðað hvort þú eigir séns. þar er eitthvert ráð sem fer í gegn um allt lífshlaup þitt svo það er betra að byrja fyrr en seinna að vinna í sínum málum og gera engin asnastrik og ef þetta ráð kemst að þeirri niðurstöðu að þú hafir verið það mikil fyrirmynd annara kaþólskra manna að eftir verði tekið þá fer umsóknarferlið í enn nánari skoðun.

Þá þarf nefnilega að sýna fram á að þú hafir gert einhver kraftaverk. Reyndar ef þú hefur látið lífið fyrir trúna, t.d verið grýttur eða krossfestur eða étinn af ljónum svo klassísk dæmi séu tekin þá dugar það alveg. Hinir þurfa að hafa framkvæmt kraftaverk og helst fleiri en eitt. Þar sem ekki er mikið um það nú á seinni tímum að fólk gangi á vatni, lækni holdsveika eða breyti vatni í vín (þó ég þekki nú kall í sveitinni sem gat það, það eina sem hann þurfti ásmt vatninu var ger og sykur og eimingartæki en það má líklega ekki nota hjálpartæki) þá þarf að finna eitthvað annað sem hægt er að flokka undir kraftaverk. Og það þarf einhver að vitna um þetta kraftaverk, það er sem sagt ekki nóg að þú segir frá því að í gær hafir þú gefið blindum manni sjón og mettað 1000 með þrem pizzum og einum skammti af brauðstöngum. En þetta meiga vera svona óbein kraftaverk. T.d gefur það dýrlingastig ef móðir vitnar um það að ungur sonur hennar hafi gleypt heilan pakka af þaksaum og litla rafmagnsrakvél en eftir að hafa beðið fyrir barninu og heitið í leiðinni á þig þá gekk allt saman niður af drengnum og enginn skaði var skeður. Það dugar líka að þú birtist einhverjum í draumi og framkvæmir eitthvað góðverk. T.d að lækna viðkomandi af berklum eða sárasótt.

Ef kraftaverkin standast ýtrustu kröfur þá ertu í góðum málum og mátt eiga von á því að verða einn góðan veðurdag gerður að dýrlingi. Í versta falli verðurðu verndardýrlingur. Það er ekki alveg jafn flott og svona over all dýrlingur en svo sem allt í lagi samt. Verndardýrlingar eru, eins og nafnið gefur til kynna, verndarar einhvers eða einhverra. Verndardýrlingur bankastarfsmanna er t.d Bernardino af Feltre (sá hefur eflaust í nógu að snúast þessa dagana), verndardýrlingur barnlausra kvenna er Anna móðir Maríu, bensínafgreiðslumenn eiga sinn verndardýrling sem er Eligius og til stendur að útnefna St. Isidore frá Seville verndardýrling internetnotenda þar sem hann samndi fyrstu alfræðiorðabókina. Mér finnst þó hér freklega gengið fram hjá Lee Seun Seup sem hné niður á netkaffihúsi í Seul og lést þann 10. ágúst 2005 eftir að hafa spilað tölvuleiki samfleytt í 49 klukkustundir. Maðurinn dó fyrir málstaðinn, hvað þarf meira til?

Dýrlingur dagsins er svo heilög Belina af Troyes sem vann sér það til frægðar að hafa dáið í hárri elli sem hrein mey.

Þá er það bara að kýla á guðhræðsluna og byrja meinlætalífið og klikka ekki á kraftaverkunum

Þrjú tonn af sandi...

Menningarvitar allra tíma hafa löngum fundið þörf hjá sér til að agnúast út í dægurlagatexta. Þeir eru bara einhver bull og þvæla og eru ekki almennilega ortir, segja þeir og hnussa. Ég skal alveg viðurkenna að
"Ertu þá farin ertu þá farin frá mér
Hvar ertu núna hver liggur mín leið
Spyrjum hvort annað hvor fari ég einn í nótt"
...er ekkert sérstaklega djúpt, en come on! Það þurfti bara að láta söngvarann segja eitthvað og því ekki þetta eins og hvað annað. Og þar sem markhópurinn er 15 ára unglingar þá þarf þetta ekki að vera mikið gáfulegra. Sjáiði t.d fyrir ykkur ungling mað buxurnar á hælunum, í allt of stórri úlpu og kúlið á hreynu syngja hástöfum
"Heyr mitt ljúfasta lag
er ég lék forðum daga
fyrir ljóshærða stúlku sem heillaði mig
þegar ungur ég var." ?
...nei, ég held ekki.

En var þetta gamla góða eitthvað mikið betra?
"Gunna var í sinni sveit
saklaus prúð og undirleit,
hláturmild, en helst til feit,
en hvað er að fást um það."
...hvaða þvæla er þetta eiginlega? Og svo er verið að gefa í skyn að fólk í þéttari kantinum sé eitthvað verra! Þetta eru auðvitað púra fordómar ofan á allt. Var hún kanski nýbúi líka?!

"Nú er ég léttur
og orðinn nokkuð þéttur
Ég er í ofsa stuði
og til í hvað sem er.

Nú er ég þreyttur
og ákaflega sveittur
í þessu létta lagi
þig legg að vanga mér"
... er þetta eitthvað skárra?! Mér myndi heldur ekki finnast það neitt rosa turn on að hafa einhvarn draugfullan og sveittan gæja slefandi ofan í hálsmálið á mér eins og lýst er í þessum texta. Næsta setning var örugglega; "eigum vidðð ekki ad komma heim till mín, elsskann?"

"Ég er hýr og ég er rjóð
Jón er kominn heim.
Ég er glöð og ég er góð
því Jón er kominn heim"
...þetta er eiginlega hálf slísí og ég vil bara ekki vita meir.

"Húsið er að gráta alveg eins og ég.
Dar-ra-ra-ra-ra, o-ó.
Það eru tár á rúðunni
sem leka svo niður veggina.
Gæsin flýgur á rúðunni,
eða er hún að fljúga á auganu á mér?
Ætli húsið geti látið sig dreyma,
ætli það fái martraðir"
...hver var á sýru hér? Eða var sveppatímabilið byrjað? Eða var það 5 ára frænka Helga Björns sem samdi þetta?

Og hver undir sextugu skilur þetta...?
"Öxar við ána, árdags í ljóma,
upp rísi þjóðlið og skipist í sveit.
Skjótum upp fána, skært lúðrar hljóma,
skundum á Þingvöll og treystum vor heit"

Ho ho ho, we say hey, hey, hey er kanski ekki svo vitlaust eftir allt saman

Matur og menn

Gleði- og menningarklúbburinn Whisky a go-go átti mikla gleði og menningarstund í gærkvöldi. Slegið var upp veislu og ekkert til sparað í mat og drykk. Þar sem að ég var gestgjafinn þá var það auðvitað ég sem fékk að ráða matseðlinum og Þar sem allir meðlimir Whisky a go-go eru karlkyns nema ég og testosteronið hvergi sparað þá tók matseðillinn mið af því. Það er nefnilega ekki sama hvort maður býður körlum eða konum í mat, hafiði spáð í því? Matseðill kvöldsins var enda afskaplega karllægur, kjöt og meira kjöt. Og það m.a.s hrátt kjöt í forrétt og næstum því hrátt kjöt í aðalrétt. Þetta hefði mér t.d aldrei dottið í hug að elda ef vinkonurnar væru matargestirnir.

Þekkið þið t.d margar konur sem fara á veitingastað og panta blóðuga nautasteik? Eða kaupir sér tvöfaldan hamborgara með extra sósu? Eða pantar pizzu með 5 kjötáleggjum? Ef svo er þá er hún örugglega trukkabílstjóri sem stundar kúluvarp í frístundum og heitir Olga. Konur borða salat og kjúkling annað hvort saman eða sitt í hvoru lagi, drekka sódavatn með og fá sér sojalatte á eftir.

Karlmaður sem kaupir sér súkkulaði og jarðarber til að borða sjálfur=gay.

Karlmanni sem finnst dökkt súkkulaði og kampavín gott = gay.

Karlmaður sem fær vini sína í heimsókn og býður upp á osta og rauðvín = gay.

Karlmaður sem borðar hnetusteik í jólamatinn = er kúgaður af konunni sinni.

Karlmaður sem borðar brokkólí = býr  hjá móður sinni og er mjög líklega enn á grunnskólaaldri

Karlmaður sem kaupir fimm ísa og alla með jarðarberjabragði = er með konunni sinni, þrem dætrum og tengdamóður. Hann borðar ekki ís sjálfur.

Karlmaður sem borðar ekki snakk og drekkur bjór fyrir framan sjónvarpið = er giftur

Karlmaður sem ropar hressilega og hneppir frá buxnasterngnum efir að hafa sporðrennt blóðugri steik = er einhleypur og verður það líklega alla æfi

 

 

70´s

Annað kvöld mun gleði- og menningarklúbburinn Whisky a-go-go halda árshátíð. Þar verður snædd skagfirsk villibráð ásamt því að dreypt verður á whisky af ýmsum tegundum. Og þá er ég ekki að tala um eitthvað blendad sull eins og Grant´s eða  Johnnie Walker heldur single malt af dýrari sortinni. Whisky er nefnilega ekki bara whisky.

Anyway, þar sem að ég er gestgjafi á þessari árshátíð þá ætla ég að brydda upp á samkvæmisleik sem að í þessu tilviki er pop quiz, þar sem meðlimir klúbbsins eru ekki bara áhugamenn um þennan eðal mjöð heldur líka miklir áhugamenn um tónlist. Og auðvitað sem ég spurningarnar sjálf og verða þær svona hæfilega kvikindislegar. Í leit að góðum spurningum fór ég að grúska aðeins bókum og á netinu og þá sérstaklega í doðranti sem heitir Rock&Pop year by year og er nákvæmlega það sem segir á umbúðunum, þ.e farið yfir það merkasta í tónlistarsögunni ár fyrir ár frá 1950-2002. Í gegn um tíðina þá hef ég komist á þá skoðun að toppurinn í tónlistarsköpun í heiminum hafi verið frá ´68-´76 og þá sérstaklega árin ´71-´74. Og eftir að hafa legið yfir þessari bók nokkur kvöld þá hef ég sannfærst enn betur. Tökum bara árið 1973 sem dæmi. Í þessari bók er að finna lista yfir topplögin í UK og USA hverja viku fyrir sig. Þar má finna þar lög eins og You´re so vain m/Carly Simon, Superstition m/Stevie Wonder, Frankenstein m/Edgar Winter Group, Angie m/Rolling Stones, Cum on feel the noize m/Slade, Rubber bullets m/10cc, Killing me softly m/Robertu Flack og svo mætti lengi telja. Miðað við þetta eru vinsælustu lögin í dag tómt sorp.

Höldum okkur við 1973 og skoðum nokkrar plötur sem komu út þetta ár. Lynyrd Skynyrd, Queen og Aerosmith gáfu út sínar fyrstu plötur, Innervisions með Stevie Wander kom út þetta ár, einnig Don´t shoot me I´m only the piano player og Goodbye yellow brick road m/Elton John, Aladdin Sane m/David Bowie, Dark side of the moon m/Pink Floyd, Houses of the holy m/Led Zeppelin, Raw Power m/Iggy Pop & The Stooges, Mind games m/John Lennon, Burnin m/Bob Marley, Greetings from Asbury Park m/Bruce Springsteen, New York Dolls m/samnefndri hljómsveit, Sabbath Bloody Sabbath m/Black Sabbath, Sweet freedom m/Uriah Heep, Tubular bells m/Mike Oldfield, Brothers and sisters m/Allman Brothers Band, Fresh m/Sly & the family Stone, Tres hombres m/ZZ Top, Berlin m/Lou Reed, Desperado m/Eagles...o.sfrv, o.s.frv. Og þetta er bara 1 ár!

Í spilaranum hér til hliðar eru svo nokkur glimrandi fín 70´s lög