loksins það sem vantaði fyrir nútíma konur!

Það er margt sem nútíma konan þarf að eiga. Hún þarf líkamsræktarkort til að hafa réttu línurnar, fallegt heimili, góðan bíl, sérhannaðar innréttingar samkvæmt Feng Shui staðli, rándýrar snyrtivörur í bílfömum, furðulega útlítandi fatnað eftir íslenska hönnuði, eitthvað af börnum og þá helst barnfóstru líka (því hver hefur tíma til að sinna þeim nú til dags?), góða vinnu til að borga fyrir allt saman eða þá kall sem er í góðri vinnu og borgar .

Það eru margir hlutir framleiddir með þarfir kvenna sérstaklega í huga enda konur gjarnan með afbrigðum kaupglaðar. Hvar væru t.d súkkulaðiframleiðendur staddir í dag ef þeir hefðu ekki konur til að kaupa næstum alla framleiðsluna? Þetta væri bara smáiðnaður. Það eru búðir eftir búðir troðfullar af kjólum og pinnahælaskóm sem allt er keypt af konum fyrir utan að inn slæðist einn og einn karlmaður í vonlausri leit að einhverri flík á konuna sína sem hún á ekki eftir að skila þar sem hún er of stór, of víð, of græn, of þykk, of síð, of gegnsæ, of lík einhverju sem einhver annar á, of ódýr, of glyðruleg.......

Nú hafa Rússar loksins sett á markaðinn endurbætta og kvenvænni útgáfu af vörutegund sem hingað til hefur helst höfðað til karla, en það er gamli góði vodkinn. Dauckas vodkinn er eitthvað sem nútíma konan má ekki láta sig vanta. Hann fæst með lime, vanillu og möndlubragði og er tilvalinn til að dreypa á eftir erfiðan dag í vinnunni eða í saumaklúbbnum. Hvað jafnast á við sushi, hreðkusalat og staup af vodka? Eftir ræktina er hægt að fá sér skyrbúst og skola því niður með vanilluvodka on the rocks. Ef börnin eru óþæg og neita að læra heima má alltaf róa taugarnar með tvöföldum möndluvodka út í kaffið því hvað er verra fyrir litlu krílin en taugatrekkt móðir að reyna að halda uppi aga? Í leiðinlegum veislum eins og t.d fermingarveislum má svo alltaf rífa upp stemminguna með vodkasjúss með kransakökunni.

Dauckas vodkinn er drykkur hinnar vel menntuðu, sjálfstæðu konu öfugt við aðrar tegundir sem tengjast frekar þessum sífullu, sjúskuðu, fjórgiftu, 8 barna mæðrum í félagsmálaíbúðum í Fellahverfinu. Dauckas hefur stíl og elegans líkt og tilvonandi kaupendur. Þetta er ekki vodki til að blanda út í goslaust, volgt kók og drekka úr plastglasi í eftirpartýi á þriðjudegi og finna engan mun þótt einhver hafi drepið í sígarettunni sinni í glasinu. Nútíma konan velur vandaða vöru. Hún velur Dauckas

megrun fyrir allan peninginn

Hver kannast ekki við að hafa einhverntíma farið í megrun? Eða í það minnsta í smá aðhald. Hjá sumum gengur það bara ljómandi vel en fyrir aðra er það álíka erfitt að missa nokkur kíló og það er fyrir íslenska Ædolstjörnu að meika það. Nánast ómögulegt! En af hverju er það?

Það er fyrir löngu vitað að til þess að skafa af sér spikið þarf maður bara að borða minna og hreyfa sig meira, hversu flókið getur það verið? Jú, vandinn er bara sá að þetta tekur allt tíma og voða margir hafa hvorki þolinmæði né viljastyrk til að borða brokkólí í 4 mánuði og þræla sér út í ræktinni á hverjum degi. Þetta er fólkið sem fellur fyrir öllum skyndilausnunum þó að það eigi að geta sagt sér sjálft að þær virka ekki.

Það er nefnilega til endalaust af allkonar drasli sem selt er í bílförmum til fólks sem telur sér trú um að það geti misst fleiri kíló mað því að nota megrunareyrnalokka, megrunarplástur, megrunararmbönd eða sett megrunarinnlegg í skóna sína. Svo ég tali nú ekki um megrunarsápuna sem þú átt að baða þig upp úr á hverjum degi og áður en þú veist af ertu orðin frá því að vera með svipað vaxtarlag og Gunnar Birgisson (undirhaka meðtalin) í það að líta út eins og Nicole Kidman. Allt sápunni að þakka.

Bumbubaninn er apparat sem margir eiga eflaust einhversstaðar í geymslunni. Með því að ýta einhverju plastdóti með handföngum upp að lafandi vömbinni í 20 mínútur á dag átti fólk að geta fengið sixpack sem hefði fengið Arnold Schwarznegger til að skammast sín. Og fyrir þá sem ekki einu sinni nenntu þessu þá var fundið upp apparat sem leyddi rafstraum í sérstakar blöðkur sem fólk festi svo á sig hér og þar. Rafstraumurinn átti svo að plata vöðvana til að halda að þú værir þvílíkt að taka á því þó þú værir í raun og veru bara liggjandi uppi í sófa að horfa á sjónvarpið og kílóin fuku án þess svo mikið sem þú svitnaðir einu sinni. Og tækið seldist eins og kaldur bjór á heitum sumardegi

Allar megrunarvörurnar sem þú átt að láta ofan í þig í staðinn fyrir mat er svo alveg sér kafli út af fyrir sig. Það eru til ótal tegundir af allskonar dufti sem á að hræra upp í vatni og enginn veit nákvæmlega hvað er í. Gæti þess vegna verið endurunnir pappakassar með vanillubragði eða þurrkað fiskihreystur. Svo eru það pillurnar sem á að taka fyrir máltíð sem eiga svo að belgjast út í maganum á þér og hey presto, þú hefur bara ekki lyst á svínarifjunum, frönsku kartöflunum og bananasplittinu sem þú ætlaðir að fara að borða.

Það hafa líka verið fundnir upp allskonar kúrar. Aitkins kúrinn væntanlega þekktastur þar sem að annað hvort léttist fólk eða endaði á spýtala með kransæðastíflu og of háan blóðþrýsting. Það er til kaffikúr þar sem þú átt að drekka sérstakan vítamínbættan kaffidrykk daginn út og inn og hreinlega horfa á kílóin hverfa. Ég meina hvernig er annað hægt þegar þú ert hæper af kaffidrykkju allan daginn, stanslaust á klósettinu og komin með hjartsláttartruflanir? Það eru til kúrar þar sem þú átt bara að borða blómkálssúpu eða harðsoðin egg eða borða bara sveppasoð á mánudögum og þriðjudögum en baunaspírur alla hina dagana

Það næst besta er þó megrunargaffallinn sem virkar þannig að þú mátt ekki stinga honum upp í þig fyrr en hann hefur gefið frá sér píphljóð þannig að þú nærð að tyggja hvern matarbita þrjátíu og tvisvar sinnum og þú borðar því ekki eins mikið. Það besta eru eflaust megrunargleraugun sem eru lituð gleraugu sem þú setur á þig þegar þú ferð að borða og eiga að hafa þau áhrif á heilastarfsemina að matarlystin minnkar. Það eru bara snillingar sem finna upp á svona hlutum!

konan með klósettið á rassinum

Fréttin um konuna sem var flutt á spýtala með klósettsetu gróna fasta við rassinn á sér er eflaust eitthvað það undarlegasta sem ég hef heyrt lengi. Samkvæmt fréttum þá hafði hún verið inni á baðinu í um 2 ár og þar af sitjandi á klósettinu í einhverja mánuði án þess að standa upp því rassinn á henni hafði bókstaflega gróið fastur við setuna þannig að það þurfti að fjarlægja hana með skurðaðgerð á sjúkrahúsi.
Og það sem gerir þetta enn furðulegra er að kærastinn hennar bjó í sama húsi allan tímann og færði henni mat og drykk! Hversu krípí er það? Það var svo að lokum hann sem kallaði til lögreglu þegar honum þótti hún vera farin að vera eitthvað slöpp greyið! Það þarf ekki að taka fram að konan hafði ekki farið í bað á þessum tíma auk þess sem hún var komin með drep í fæturnar af allri klósettsetunni.
Hvernig skyldi heimilislífið hafa verið hjá þeim?

Bank, bank...
"Heyrðu elskan, þú ert búin að vera á klósettinu í 6 vikur. Ferðu ekki að verða búin?"
Eða hvernig ætli það hafi verið þegar hann kom með félagana heim til að fá sér bjór?
"Strákar, látiði Siggu ekki trufla ykkur þó hún sitji á klósettinu. Pissiði bara í baðið. Ég geri það alla vega sjálfur."
"Sigga mín, maðurinn í byggingavöruversluninni sem seldi okkur Gustafsberg klósettið spurði mig um daginn hvernig okkur líkaði það og ég sagði að þú gætir ekki slitið þig frá því"
"Hvað segirðu elskan! Kláraðist pappírinn í október og ertu búin að sitja og bíða eftir að ég komi með meiri pappír síðan þá? Ég hef bara alveg stein gleymdi því!"

Ég velti líka fyrir mér að það hafi nú verið lán í óláni að klósettið stíflaðist ekki þessa mánuði sem konan sat þar sem fastast. Og hvernig ætli það hafi verið að sofa sitjandi svona? Og ég hef líka heyrt einhversstaðar að það sé hægt að fá gyllinæð af því að sitja of lengi í einu(þá er væntanlega átt við þá sem hafa það að vana að lesa eins og eitt blað meðan þeir sitja á kamrinum), hvernig ætli ástandið hafi verið hjá þessari ágætu konu?

Og hvar annarsstaðar en í heinhverju trailerpark í ameríku gerast svona hlutir?

Túrismi

Nú er fólk sjálfsagt farið að spá í það hvert skal halda í sumarfríinu. Er það Kanarí 18. árið í röð, er það sumarhús í Danmörku eða á að taka áhættu og skella sér til Krítar? En hvernig væri bara að taka þetta með trompi og fara til Ríó eða Jóhannesaborgar? Þar er nefnilega hægt að fara í svolítið merkilegar skoðunarferðir um alverstu fátækrahverfi þessara borga í fylgd með innlendum leiðsögumanni sem sýnir feitum og pattaralegum vesturlandabúum á miðjum aldri aumust slömm viðkomandi borga. Og allt saman fyrir væna greiðslu auðvitað

En sitt sýnist hverjum um þessar slömm ferðir. Það eru þeir sem lýta á þetta sem hreina niðurlægingu fyrir íbúana. Eða hvernig fyndist okkur t.d að tvisvar á dag stoppaði rúta fyrir framan hjá okkur og út úr henni hrúguðust amerískir kallar og kellingar á sextugsaldri með gullhringi á hverjum fingri, rándýrar myndavélar um hálsinn og bótox þrútið andlit og byrjuðu að smella af okkur myndum í gríð og erg og ég tala nú ekki um ef við byggjum í bárujárnskofa og ættum bara einn umgang af fötum, þau sem við stæðum í? Svo færu allir upp í rútu aftur og stuttu seinn til síns heima á Palm Beach í einbýlishúsin sín. Ekki eitthvað sem okkur myndi langa til að upplifa geri ég ráð fyrir
Svo eru það hinir sem segja að þeir sem fari í þessar skoðunarferðir kaupi alltaf eitthvað af handverksfólkinu í hverfinu og komi jafnvel til með að gefa peninga til menntunar og uppbyggingar á svæðinu eftir að hafa séð fátæktina með eigin augum

Núna þegar allt er að fara til fjandans á Íslandi þá er ekki úr vegi að einhverjir framtakssamir aðilar fari að skoða þennan ferðamöguleika fyrir alvöru hér heima. Við eigum kanski ekki jafn slæm hverfi og þair þarna í Rio en það mætti bjóða ríkum Japönum eða Þjóðverjum upp á skoðunarferð um Fellahverfið og nágrenni. Því þó að Gullfoss og Geysir séu voða fínir staðir og allt það þá gefur það ekki alveg rétta mynd af Íslandi að sjá bara svoleiðis staði. Það mætti t.d taka rútu upp að Fellaskóla og fylgjast með vandræðaunglingum kveikja í ruslatunnum og brjóta nokkrar rúður. Síðan mætti ganga með hópinn um Unufellið og Æsufellið skoða yfirgefin verslunarhús og brotna póstkassa og jafnvel taka Pólska eða Tælenska íbúa hverfisins tali. Síðan mætti rölta um Vesturbergð og í Bakkana, bragða á heimabruggi og örbylgjupizzum og fylgjast með fjölskylduerjum eða handrukkurum að verki á meðan. Að lokum mætti staldra við á hverfispöbbnum Búálfinum og horfa á Leikfélag Fella- og Hóla flytja einþáttungana "Kerfið sveik mig" og "Síðasti sopinn í bænum" og hljómsveitin Búsbandið endaði svo á að taka nokkur Bubba lög.
Ég gæti bara vel trúað að þetta ætti eftir að verða gríðarlega vinsælt

Það kostar peninga að leika sér

Ég hef alltaf dáðst að fólki sem hefur atvinnu af því að leika sér að sama skapi og það er ekki laust við að ég öfundi það svolítið líka. Nú er ég ekki að tala um íslenska fjárfesta heldur íþróttamenn. Það er m.a.s fullt af fólki sem fær ógeðslega mikið af peningum fyrir að leika sér fyrir framan aðra.

Ástæðan fyrir því að ég er að tala um þetta er að núna er verið að stækka Laugardalsvöllinn þar sem jafnvel einhverntíma í ófyrirséðri farmtíð, ef við erum heppin og látum okkur dreyma, munu vinnast glæstir sigrar á knattspyrnuvellinum. Það eina sem skyggir á gleði kanttspyrnuforkólfanna er nánasarháttur og væl í einhverjum skrifstofublókum hjá borginni sem eru að gera veður út af smávægilegri umframeyðslu. Til að skýra þetta mál er hér stutt viðtal við Geirmund Þórsteinsson aðstoðar gjaldkera hjá KSÍ

Blm: Nú hefur vinna við stækkun Laugardalsvallar farið 400 milljónum fram úr áætlun, hvernig skýrið þið það?

GÞ: Ja þessi áætlun var nú gerð í fyrra og er klárlega barn síns tíma og margt hefur breyst síðan þá

Blm: Eins og hvað?

GÞ: Tja, fyrir það fyrst er núna árið 2008 sem var klárlega ekki í fyrra og svo er bara allt orðið svo ferlega dýrt!

Blm: Nú eigum við fótboltalandslið sem getur ekki neitt, er einhver ástæða til að vera að púkka undir það?

GÞ: Við hjá KSÍ lítum svo á að nú sé leiðin bara upp á við, sérstaklega eftir frækinn 2-0 sigur á landsliði Tonga í vináttulandsleik nýverið.

Blm: En nú mættu leikmenn Tonga í strápilsum og voru berfættir auk þess sem þeir voru aðeins 10 í liðinu þar sem fundust ekki fleiri í landinu sem kunnu fótbolta

GÞ: Alltaf skulið þið fréttamennirnir þurfa að gera lítið úr afrekum okkar fræknasta íþróttafólks á erlendri grundu! T.d komst íslenskur skíðamaður heilu og höldnu niður  brekku í stórsvigskeppni í Danmörku um daginn og ég minnist þess ekki að það hafi verið eytt mörgum orðum í það í fjölmiðlum

Blm: Þessi brekka var álíka brött og Arnarhóll

GÞ: Arnarhóll getur verið ansi brattur skal ég segja þér væni minn!

Blm: En aftur að vellinum, þykir það eðlilegt að helmingur áhorfendasvæðisins sé undirlagður undir VIP stúkur með 3 börum, lazy-boy stólum, prívat 4 stjörnu veitingastað, mini golfi, nuddi og sánaklefa?

GÞ: Við þurfum auðvitað að gera vel við okkar styrktaraðila, þessir bankakallar eru bara svo góðu vanir.

Blm: En hvað með að eyða 120 milljónum í að innrétta skrifstofur og fundaraðstöðu KSÍ þar sem er m.a 70 manna bíósalur, vísundaskinn á öllum stólum og koníaksstofa sem var sér innflutt í heilu lagi frá Búrgúndí?

GÞ: Við hjá KSÍ erum einfaldlega stórhuga og erum ekki að tjalda til einnar nætur

Blm: Og er það satt að það hafi gleymst að gera ráð fyrir kvennaklósettum og að blaðamannastúkan sé í gámi úti á bílastæði?

GÞ: Ja konan mín hefur nú nokkrum sinnum komið með mér á leiki og ég minnist þess ekki að hún hafi þurft að fara á klósettið

Blm: En nú hljóta að vera spilaðir einhverjir kvennalandsleikir enda íslenska kvennalandsliðið að gera góða hluti?

GÞ: Ha? Hvaða kvennalandslið?

Blm: Í fótbolta

GÞ: Nú, er það til?! Ja ekki er öll vitleysan eins segi ég nú bara! Áður en maður veit af eru þessar kellingar farnar að keyra vörubíla eða skipta sér af stjórnmálum!

Árans ólukka

Eitt af því sem móðir mín kenndi mér var að maður á ekki að hlæja að óförum annara. Þess vegna finnst mér það graf alvarlegt mál hversu illa er komið fyrir nýríku fólki á Íslandi í dag og finnst það til skammar þegar öfundsjúkir einstaklingar segja glaðhlakkalega frá hrakförum þess með glott á vör.
Það er örugglega hræðilegt að missa Range Roverinn sinn á uppboð bara vegna þess að hlutabréfin í Japönsku húlahringjaverksmiðjunni eða Búlgarska kleinuhringjaframleiðandanum hafa hrapað í verði. Ég meina hver átti von á því að heimsmarkaðsverð á húlahringjum myndi lækka um 58% á nokkrum vikum?

Íslenskir athafnamenn hafa efnast vel á síðustu árum sökum áræðni og næmni fyrir lögmálum markaðarins en ekki vegna þess að það hefur verið svo mikil uppsveifla að það hafi verið hægt að græða á hvaða rugli sem er, jafnvel framleiðslu á vasaljósum sem ganga fyrir sólarljósi og rafmagns eyrnapinnum eins og illar tungur halda fram.
Mér er ekki hlátur í huga þegar ég sé fréttir af því að menn hafi þurft að selja sérhönnuðu skrifstofurnar sem áttu að bera eigendunum og fáguðum smekk þeirra fagurt vitni og það m.a.s án þess að hafa náð að máta forstjórastólinn. Eða hvarsu erfitt er það fyrir stórhuga fyrirtæki í hringiðu alþjóða viðskipta að geta ekki lengur sent stjórnarmenn á fundi í útlöndum í sinni eigin einkaþotu? Það er bara ekki traustvekjandi að mæta með venjulegu áætlunarflugi sem þú veist aldrei hvort druslast af stað á réttum tíma, maturinn er vondur, flugfreyjurnar gamlar og blaðskellandi kellingar og slompaðir kallar af fyrsta farrými eylíft að rápa inn á Saga Class til að komast á klósettið. Hver getur einbeitt sér að því að rýna í flóknar viðskiptaáætlanir undir svona kringumstæðum?

Og þetta er ekki allt. Núna er eintómt væl og bölmóður í bönkunum og ekki lengur hægt að fá lánaðar svo mikið sem 100 milljónir hvað þá meira! Ég meina hvað fær maður fyrir minna en 100 milljónir í dag? Frystihús á Vestfjörðum kanski, en hver vill það? Þetta er gengið svo langt að bankarnir hafa neyðst til að segja upp gjaldkerum og ræstingafólki í stórum stíl til að lækka rekstrarkostnað og einn bankastjórinn gekk á undan með góðu fordæmi og lækkaði launin hjá sjálfum sér og lætur sér nú duga að lifa einföldu og látlausu lífi af 3 milljónum á mánuði auk þess sem þessar 300 milljónir sem hann fékk fyrir að byrja í vinnunni eiga nú eftir að koma sér vel.

Það er líka af sem áður var þegar ekkert fjármálafyrirtæki með sómatilfinningu gat verið þekkt fyrir annað en að bjóða ubb á heimsþekkta skemmtikrafta á árshátíðum og öðrum stærri samkoum. Nú meiga menn prísa sig sæla ef Herbert Guðmundsson mætir og tekur lagið.
Því segi ég, verum góð við nýríka fólkið, það á bágt

Spáiði í það hvað þið setjið á netið?

Hver kannast ekki við tengslasíður eins og My Space og Facebook? Vinnuveitandinn ykkar kannast eflaust við þær og er ekki sérlega hrifinn, hvað þá af MSN eða þessu bévítans bloggi. Það byrjar nefnilega enginn að vinna á morgnana nema hafa hangið á netinu í svona klukkutíma fyrst. Jú kanski iðnaðarmenn sem hafa enga tölvu til að slugsa yfir, þeir hanga bara í kaffi í staðinn.

 Anyway, að hanga á netinu er samt ekki bara að hanga á netinu. Það skiptir máli hvernig hangsinu er háttað. Það sem þú setur á netið er þar for everyone to see. Ef fólki er á annað borð annt um mannorð sitt og ímynd út á við þá ætti það að spá í hvað það setur á netið. Ef þú ert t.d að leita þér að góðri vinnu þá skiptir það miklu máli. Það er þér ekki til framdráttar ef tilvonandi vinnuveitandi, sem er t.d virðuleg fjármálastofnun sem ekki má vamm sitt vita googlar þig og það fyrsta sem poppar upp eru myndir frá blautbolakeppni á Fjörukránni eða ef þú ert karlmaður og póstaðir á My Space síðunni þinni vídeói af því þegar þið félagarnir stunguð stjörnuljósum upp í afturendann á hvor öðrum á síðasta gamlárskvöldi. Mjög fyndið þá eflaust en ekki það sem að þú vilt að bossinn þinn sjái.

 Það eru til fyrirtæki úti í hinum stóra heimi sem hafa þá starfsemi að finna upplýsingar um fólk á netinu. Þá annað hvort til að eyða þeim fyrir viðkomandi aðila sem telja þær sér skaðlegar eða að einhver þriðji aðili vill komast að öllu um þig sem hægt er að grafa upp. Þegar þú ert orðinn ráðsettur fjölskyldufaðir með konu, börn og jeppa og ert jafnvel að hugsa um að demba þér í pólitíkina þá viltu alls ekki að myndirnar af þér frá Hróarskeldu ´96 þar sem þú lást inni í tjaldi með jónu á stærð við upprúllaðan sunnudagsmogga og tvær hálfnaktar súludansmeyjar í eggjandi stellingum að halda uppi fjörinu, leki út. Og bloggið þar sem þú segir frá því á hispurslausan hátt að raddirnar í höfðinu á þér hafi sagt þér að það vséu geimverur á meðal vor að reyna að taka yfir heiminn og að þær búi í Vogunum, er heldur ekki gott move.

Og strákar mínir, stelpurnar hafa fyri löngu tekið tæknina í sína þágu. Þú hittir stelpu á djamminu, þið farið að daðra pínu, þið skiptist á símanúmerum og svo fer hver til síns heima (nema auðvitað að báðir aðilar sleppi undanrásunum og fari beint í úrslitaleikinn). En svo hringir daman ekki til baka og svarar ekki þegar þú hringir og þú skilur ekkert í af hverju? Jú, ástæðan er einföld. Það fyrsta sem hún gerði var auðvitað að googla þig og komst að því að þú hljópst allsber inn á Laugardalsvöllinn í landsleik fyrir þrem árum, þú safnar límmiðum af bjórflöskum og að í fyrra fórstu á Star Trek ráðstefnu í Los Angeles, þú kannt Klingónsku og það er mynd af þér í Klíngónabúning á heimasíðunni þinni. Fyrir allt venjulegt kvenfólk þá er þetta ekki mikið turn-on.

Þannig að næst þegar þið setjið eitthvað á netið spáiði í því hvað þið eruð að setja þangað. Og ef þið eruð á 5. glasi, sleppiði því bara alveg!

Þú ert það sem þú borðar

Hver kannast ekki við umræðuna um ofvirkni og athyglisbrest? Börn í dag eru ekki lengur óþekktarormar og slugsar sem ekki hafa verið siðuð almennilega til af foreldrum sínum heldur eru þau með ofvirkni og athyglisbrest og gott ef ekki lesblindu líka. Það er sem sagt búið að gera þau að heilbrigðisvandamáli með tilheyrandi lyfjaáti og sérfræðimeðferðum í staðinn fyrir að kenna þeim einfalda mannasiði og að hegða sér skikkanlega. Leti og uppivöðslusemi eru svo afsökuð með því að aumingja barnið þjáist af ofvirkni og geti bara ekkert í þessu gert.

En það er ýmislegt hægt að gera annað en að troða í krakkann rítalíni. Til að byrja með er hægt að ala hann almennilega upp og kenna mannasiði en til þess þarf tíma og einbeittan vilja og oft á tíðum virðast foreldrar hafa hvorugt. Skólinn á að sjá um þetta. Annað sem myndi eflaust bæta ástandið á mörgum heimilum og í mörgum skólastofum er að gefa börnunum almennilegan mat. Það eru nefnilega gömul sannindi og ný að þú ert það sem þú borðar. Og þetta á reynadar ekki bera við um börn heldur hreinlega alla. Fólk nennir ekki orðið að elda mat frá grunni lengur, heldur er allt keypt tilbúið eða eitthvað unnið.

Vitið þið t.d hvað er í pylsum (sjá mynd hér til hliðar af innvolsinu í pylsu) eða örbylgjumat? Við erum endalaust að belgja okkur út af litarefnum, rotvarnarefnum, þráavarnarefnum, þykkingarefnum, bindiefnum, sýrum, sætuefnum, bragðaukandi efnum o.s.frv, o.s.frv. Næst þegar þið kaupið eitthvað tilbúið athugið á umbúðunum hvað það eru mörg E-efni í viðkomandi vöru. Ég er t.d með hérna fyrir framan mig dós af Coke Light og í henni eru E 150 sem er lirarefni, E 338 og E 339 sem eru sýrur, E 211 sem er rotvarnarefni og sætuefnið aspartam. þetta getur ekki verið hollt. Mér finnst líka alltaf skondið að sjá þegar því er slegið upp í auglýsingum að þessi eða hin matvaran sé fitusnauð. Gott og vel, en það er ekki minnst á hvað er mikill sykur í viðkomandi vöru og ef það er eitthvað sem við þurfum ekki á að halda að borða meira af þá er það sykur, ekki fita. Í einni lítilli fernu af Frissa Fríska sem fólk fóðrar börnin sín gjarnan á eru 20 gr. af sykri sem eru ca. 10 sykurmolar og í einni dós af Skólajógúrt eru 5 sykurmolar. Svo er fólk hissa á því að börnin séu snar vitlaus!

 Á mínum sokkabandsárum norður í landi var ekki svona mikið um unnin matvæli eins og er í dag og þar var eldað á hverju heimili nánast á hverjum degi (hina dagana voru afgangar). Hamborgarar og franskar voru sjaldan í boði og pizzuvæðingin hafði ekki yfirtakið allt enn og sælgæti var spari. Ég minnst þess heldur ekki að í minni grunnskólatíð hafi einhver átt við ofvirkni, athyglisbrest eða einhverjar geðraskanir að stríða. Stundar athyglisbrestur var oftast læknaður snarlega á staðnum með hótun um heimsókn til skólastjórans. Það voru vissulega alltaf einhverjir einn eða tveir óþekktargemlingar í hverjum bekk en enginn sem var óviðráðanlegur eða stjórnlaus og kennarar þurftu ekki að vera búnir að taka námskeið í sjálfsvarnaríþróttum til að komast í gegn um skólaárið.

 Hvernig væri nú að í staðinn fyrir að aumingjavæða fjöldann allan af grunnskólabörnum og moka í þau lyfjum að þeim væri bara gefið almennilega að borða?

Eurotrash

Ég hef ekkert verið að tjá mig um Júróvisjón hingað til enda ekki heyrt neitt af þessum lögum, eða þar til í kvöld. Ég sá fram á það að ég yrði nákvæmlega ekkert með í umræðunum næstu dagana ef ég hefði ekki horft á öll ósköpin og þar sem ég legg það heldur ekki í vana minn að tala um það sem ég veit ekkert um (ég starfa nefnilega ekki sem stjórnmálamaður) þá lagði ég á mig þessa rannsóknarvinnu.
Það ryfjaðist upp fyrir mér strax á fyrstu mínútunum af hverju ég hef ekki lagt mig neitt sérstaklega eftir því að fylgjast með þessari keppni undanfarin ár, þegar flutt var syrpa af gömlum Júróvisíonslögurum. Helmingurinn af lögunum hljómaði eins og þau væru eftir Geirmund Valtýsson og vekja eflaust góða stemmingu á sveitaballi í Miðgarði. Hinn helmingurinn var eins og Þorvaldur Bjarni hefði annað hvort samið þau eða útsett þar sem allt sem hann kemur nálægt hljómar eins. Og hverjum öðrum en RÚV dettur í hug að láta mann sem gæti verið ný kominn af þorrablóti á Ströndunum og ennþá í gúmmístígvélunum og hefði fram að þessu haft atvinnu af að stýra landbúnaðarsýningum kynna svona galmúrshow?
En hvernig voru svo lögin?
Lag 1. Þorsteinn Olgeirsson. Late 80's Elton John rip off. Og late 80´s var mjög vont tímabil hjá Elton John. Og af hverju þurfa lúðrablásarar alltaf að vera eins og fífl?
Lag 2. Páll Rósinkrans. Týpískt Sálarlag með einhverju gospel tvisti. Svona allir-saman-nú viðlag og á eftir að slá í gegn hjá Hvítasunnusöfnuðinum. Kosið af eldri konum sem finnst hann Páll svo góður drengur
Lag 3. Eurobandið. Europop í sinnu bestu eða verstu mynd, eftir því hvernig litið er á það. Á eftir að hljóma á diskótekunum í Búlagaríu og Rússlandi þar sem Europopið er það heitasta í dag. Verður líka eflaust blastað á næstu Gay Pride
Lag 4.Ragnheiður Gröndal. Höfundur þessa lags hefur horft á allt of mikið af söngleikjum í gegn um tíðina og dreymir dagdrauma um frægð og frama á Broadway. Ég var búin að gleyma hvernig þetta lag var 2 mínútum eftir að það kláraðist
Lag 5. Mercedes club. Ef það væri 1991 og allir væru enn að fara á raveklúbba og hakka í sig E pillur þá væri þetta lag kanski eitthvað í takt við tímann. Held m.a.s að þetta sé of yesterday fyrir Rússana og Búlgarina. Söngkonan hefur heldur ekki verið valin út frá sönghæfileikum heldur örugglaga af því að hún leit best út í latexdressinu. Tvímælalust kjánahrollur kvöldsins.
Lag 6. Baggalútur. Æji, óskaplega er þetta mikið þúfnapopp. Þetta er jafn íslenskt og Hvannarrótarbrennivín og kæst skata og höfðar nákvæmlega jafn mikið til annara þjóða og þær "ágætu" afurðir. Rétti staðurinn fyrir þetta lag er Kringlukráin á laugardagskvöldi
Lag 7. Birgitta og Magni. Álíka tilþrifamikið lag og blautir ullarsokkar og jafn minnisstætt og síðasta klósettferð. Og í hverju var Birgitta eiginlega? Designer rjúpnavesti?!
Lag 8. Dr. Spock. Líklega skásta lagið í keppninni en ekki merkileg lagasmíð. Verðlaun fyrir bestu búningana. Fyrirmynd Dr. Spock er augljóslega Mike Patton og Mr. Bungle og er langt um betri

Þú gætir haft það verra...

Það eru margir sem sífellt nöldra og tuða yfir vinnunni sinni. Hvað hún sé nú leiðinleg og einhæf og erfið og heilsuspillandi og mannskemmandi og hver veit hvað. Svo ekki sé minnst á hvað kaupið sé lélegt og vinnutíminn langur. Ég hélt reyndar að nú orðið væru það Pólverjar sem sinntu öllum þeim störfum sem þessi lýsing ætti við en það kann að vera misjafnt hvað fólki finnst erfitt og heilsuspillandi. Einhverjum finnst kanski erfitt að tapa 700 millum í hlutabréfabraski meðan aðrir gera það með brosi á vör og fá feitan starfslokasamning fyrir ómakið

En þið sem finnst þið vera í ömurlegu djobbi getið mörg hver huggað ykkur við það að það er til ýmislegt verra en það sem þið þurfið að gera. Kyngreinir á kjúklingabúi er t.d varla mjög eftirsóknarvert starf en það er samt sem áður starf sem einhver þarf að sinna. Það felst sem sagt í því að skoða upp í afturendann á hænuungum til að komast að því hvers kyns þeir eru því t.d eggjabú hefur lítið með fjöldann allan af hönum að gera. Þeir eru væntanlega bara étnir.

Ef þú vinnur hjá svitalyktareyðisframleiðanda gæti starf þitt verið að þefa af mis sveittum handarkrikum allan daginn til að fylgjast með gæðum framleiðslunnar.

Vísindarannsóknir á hvölum er eitthvað sem við könnumst við. Hér eru þeir bara drepnur og innvolsið skoðað í rólegheitum. Hjá siðaðri þjóðum eru ekki eins brútal aðferðir notaðar heldur er hvalaskít safnað og hann skoðaður gaumgæfilega. Og það er sem sagt til fólk sem vinnur við að veiða upp hvalaskít

Að vera vísindamaður er fancy djobb en vísindastörf eru æði misjöfn. Fornleifafræði þekkja allir en það er líka til nýleifafræði ("garbology") sem felst í því að gramsa í ruslatunnum og ruslahaugum til að rannsaka t.d neyslumynstur fólks. Slíkar rannsóknir hafa til að mynda sýnt fram á það að bleyjur er um 2% af venjulegum ruslahaug meðan 45% er ýmiskonar pappír og að pylsa getur geymst í vel þjöppuðum ruslahaug í allt að 25 ár án þess að rotna að fullu. Einnig að það er samhengi á milli kattaeignar (þ.e losunar á kattaúrgangi) og lesturs á Séð og Heyrt

Að gelda fíla í dýragörðum er líka starf sem þarf að sinna því ógeltir fílar eins og önnur karldýr, geta verið viðskotaillir og önugir. En þar sem fílaeystu er aðeins á stærð við fótbolta en fíllinn sjálfur all mikið stærri og erfitt að komast að þeim þá er þetta ekki starf fyrir hvern sem er.

Starf ræstitæknis þykir ekki spennandi nú til dags en að vera ræstitæknir í líkhúsi þar sem framkvæmdar eru krufningar er líklega mest óspennandi af öllu nema þú sért týpan sem finnst spennandi að finna alltaf eitthvað nýtt í ruslinu, ef ekki búta af rifbeinum eða afskurð af húð þá bita af lifur eða eitt eyra eða tvö. Viðkvæmni fyrir blóði og öðrum líkamsvessum gengur heldur ekki í því starfi.

 Þannig að þið sem kvartið undan vinnunni ykkar takiði gleði ykkar á ný, þetta gæti nefnilega verið miklu verra